No día de hoxe celebramos a xornada de convivencia intercentros organizada polo Concello de Malpica.
Había moitas ganas de pasalo ben entre amig@s: saltando, bailando... xunt@s!
Agradecemos ao Concello, un ano máis, a invitación a unha lúdica xornada que se desenvolveu no CEIP Joaquín Rodríguez Otero de Buño.
Un curso máis, desenvolvemos a Xornada sobre rodas. Unha actividade que gusta a peques e maiores, vivenciando a educación vial: respectando os sinais verticais, o sentido da circulación e á autoridade, representada polo alumnado de 6º de primaria que facilitou a circulación e ata aplicou algunha sanción por velocidade.
Feliz verán... sobre rodas!
.jpg)
Paco Nogueiras co seu novo traballo, Son Animal, pechou o PDI que nos ocupou estes dous últimos cursos.
Un concerto protagonizado por moitos animais, que animaron a peques e maiores nunha xornada para bailar e cantar.
Ao tempo, Paco asinou o exemplar da nosa biblio e o caderno de visitas que recolle os encontros culturais da nosa comunidade.
.jpg)
.jpg)
Contar con Paco Nogueiras sempre é un éxito, agradecid@s de compartir unha xornada do máis divertida con Paco e os seus animais.
Aproveitando que no centro dispoñíamos de ducias e ducias de libros de expurgo, para a conmemoración do Día do Medio Ambiente decidimos darlles unha segunda vida.
Cada aula acercouse á zona de libros de expurgo do primeiro andar e levou varios para a aula. Despois, iniciaron o seu propio proceso creativo, guiados polas titoras/es.
Recortaron, pegaron, pintaron, superpoñeron materiais, engadiron ou eliminaron texto... E mesmo crearon as súas propias historias de cero, recortando palabra de diferentes libros para xuntalas noutro novo!
Clica na imaxe para acceder á galería.
.jpg)
.jpg)
O venres 20 de xuño, último día lectivo do curso 2024-25, invitamos a comunidade á Xornada de Portas Abertas para compartir xogos populares en familia.
Se hai dispoñibilidade, non dubidedes en compartir a xornada c@s vos@s fill@s, despedindo un curso do máis natural e saudable.
Desde Galeatro, da man de Mario, recibimos o cartel do I Maratón Teatral do Concello de Malpica que se celebrará mañá 6 de xuño.
Funcións que se representarán no Centro Cívico e Cultural, en horario de mañá para todo o alumnado do noso centro e en horario de tarde, tal e como se reflicte na imaxe do cartel, aberto a todo o público.
Obradoiro de Animación Teatral no que se inscribiu, a comezo de curso, alumnado do noso centro. Alumnado que mañá presentará e representará todo o traballo realizado ao longo do curso: traballo en equipo, habilidades persoais e sociais...
Seguimos crendo na cultura, no teatro como motor de cambio social, de promoción de valores, de fomento de diálogo para a construción dun mundo mellor.Animádevos a unha xornada cultural c@s máis cativ@s!
Premendo no seguinte enlace accederedes a algunhas imaxes das funcións representadas:
Presentamos a guía de verán 2025, festexando a chegada dunha nova estación entre libros e outros materiais educativos para o tempo de lecer.
Un tríptico en formato papel que será entregado a toda a comunidade o último día lectivo, xunto cun exemplar da nosa revista escolar que tamén ofrecemos en formato dixital para poder acceder a máis información premendo en cada enlace.
Libros para todos os gustos, para divertirse, emocionarse, informarse e xogos para compartir en familia ou con amig@s.
Este verán, Leo le... a gusto!
O alumnado de educación infantil e 1º ciclo de primaria gozou cos contos e cantos de Anxo Moure. Contando, cantando e tocando animou a pequen@s e maiores, transmitindo o respecto, coidado e preservación do medio. Historias solidarias coa terra e as persoas que a habitan, defendendo o conto como ferramenta educativa, tal e como se recolle no proxecto de Anxo Moure: contos solidarios.
O seguinte vídeo é un resumo da divertida e educativa sesión con Anxo Moure.
Agradecid@s ao Consorcio Editorial Galego por facilitarnos a sesión e a Anxo Moure pola súa gran sensibilidade e amabilidade.
Un curso máis realizamos a clausura da Biblioteca Escolar-Leolab facendo entrega dos recoñecementos, máis que merecidos, a alumnado e aulas: voluntariado solidario, lectura, radio, reciclaxe, actividades lúdicas e deportivas.
Un mar de experiencias vividas e compartidas ao longo dun curso no que finalizamos un novo PDI e valoramos o esforzo, a implicación e a solidariedade da nosa pequena comunidade, como se reflicte no seguinte vídeo co que pechamos o acto de clausura: lectura, información e aprendizaxe ao servizo do currículo e de tod@s, compensando as desigualdades de partida.
Clausura BE-Leolab 2024-25 de bemilladoiroDespedir o curso rememora vivencias e emocións compartidas, e o noso "ATA PRONTO E FELIZ TRAVESÍA" vai dirixido ao alumnado de 6º de primaria que pecha unha etapa para iniciar outra, mais ben saben que esta sempre será a súa escola bibliotecaria.
Continuará!
Feliz verán lector!
Convidamos a toda a comunidade, a partir das 12:00 h., a pechar o programa Lectura e Familias con Migallas Teatro no adro da igrexa de Malpica, se o tempo o permite, en caso contrario a función desenvolverase no colexio.
Animádevos a pasar unha divertida xornada... en familia!
Chegou o día e, por causas alleas ao centro, pechamos o programa Lectura e Familias con Carlos Yuste de Migallas Teatro na nosa biblio e celebrando o Día do Medio Ambiente: contos naturais, pan de milllo... Unha xornada con gran afluencia de familias, ás que agradecemos a súa asistencia, e do máis divertida entre contos e cantos.
.jpg)
No día de hoxe, o alumnado de 5º e 6º de primaria asistiu e participou na actuación de Felisa e Montse, Axúdame a cantar, que se realizou no Centro Cívico e Cultural e dentro do programa "Nun Mar de Letras" do Concello de Malpica.
Finalizaron con agasallos en forma de libro para todas/os, Agora que vén a noite de Marcos Calveiro. Un exemplar que tamén catalogaremos na nosa biblio.
Agradecid@s ao Concello por facilitarnos actividades culturais, festexando... AS NOSAS LETRAS!
.jpg)
O alumnado de 4º e 5º de primaria desenvolveron a formación de Radio na biblio con Damián Alonso, de Ponte... nas Ondas!
As/os biblioaxudantas/es de Radio na biblio (5º de primaria) e o alumnado que os sucederá o vindeiro curso (4º de primaria) traballaron técnicas de expresión oral xunto coa edición dun guión e a súa posterior gravación.
O vindeiro curso, máis (in)formación!
Presentamos, en formato dixital, a terceira edición do noso Galicómic: produción propia de banda deseñada, en lingua galega, e facendo uso da fotografía ou a técnica croma key.
Nenas/os protagonistas das súas producións, en relación co PDI: natureza, saídas, respecto e coidado do medio, benestar persoal e social...
Produción propia que está en proceso de maquetación para ser catalogada na nosa biblio, valorando e custodiando as producións de todas e todos.
Un curso máis, parabéns a tod@s!
Un curso máis, e xa van tres, desenvolvemos o programa Lectura e Familias: educa-tribo.
Un programa que permite a lectura compartida coas familias e entre iguais, así como formación para toda a comunidade.
Achegamos enlaces ao álbum de fotos das lecturas compartidas e das formacións, premer en cada título para acceder:
Agradecid@s a toda a comunidade pola súa colaboración e implicación na implementación do programa, que inclúe actividades xa sistematizadas na nosa biblioteca.
O vindeiro curso máis lectura e familias!
Pechamos, con Boniface Ofogo, un Mes das Letras do máis cultural e diverso.
Boniface mantivo un encontro co alumnado de 4º de primaria, que tiña moitas preguntas sobre os seus libros e biografía. O escritor e griot (figura tradicional de África encargado de narrar historias) respondeu transmitindo moitos valores e ensinanzas, como a paciencia, non a lentitude que se asocia á tartaruga.
Despois do encontro, gozamos no Centro Cívico e Cultural de Malpica, da súa mestría como contacontos. Contos de animais e ata cantos, que tanto gustaron.
Todo un éxito de encontro e contos da man de Boniface Ofogo. Agradecid@s polo seu bo facer.
O escritor Antón Cortizas, mestre xubilado, mantivo un encontro coas aulas de 2ºA e 2ºB/3º de primaria para falar sobre o seu libro, "Os versos da mariola", incluído no Plan Lector das aulas.
Unha xornada entre libros, brinquedos de papel e xogos de palabras que tan ben argalla Antón. Ao tempo, asinou os exemplares do alumnado, da biblioteca e entregounos un fermoso agasallo en forma de libro, "Tenrura", tamén asinado polo autor.
.jpg)
Agradecid@s a Antón pola súa amabilidade, bo facer e o agasallo en forma de libro para a nosa biblio (na imaxe o exemplar "Tenrura" da súa autoría, un fermoso agasallo asinado); así como a Edicións Embora que nos facilitou o encontro.
.jpg)
.jpg)
Todo un éxito de xornada na nosa lingua, entre libros e brinquedos!
Pechamos o noso Mes das Letras celebrando o Festival que xa nos é propio. Festival no que todas as aulas celebraron a lingua galega, a tradición oral, o noso rico patrimonio inmaterial e do que podedes ver e saber máis accedendo aos blogs de cada ciclo.
Un Festival no que soou e resoou a pandeireta, a gaita, as cantigas, o himno galego... en colaboración con familias e membros da comunidade, aos que agradecemos a súa participación; ao igual que ao Diario de Bergantiños por facerse eco da nosa celebración, como podedes ver e ler premendo na seguinte imaxe da portada do xornal.
Hoxe, 17 de maio de 2025, a Real Academia Galega celebra o seu pleno extraordinario no mesmo Centro Cívico e Cultural de Malpica onde a nosa escola rendeu homenaxe a todas as cantareiras e pandeireteiras, a nosa rica tradición oral e cultural para seguir valorando e preservando o noso.
Feliz Día das Letras Galegas, hoxe e todos os días do ano!
.jpg)
Presentamos as últimas adquisicións do curso 2024-25, que ao longo do 2º e 3º trimestre foron ampliando o catálogo da nosa biblioteca con exemplares diversos.
Exposición, a de novidades, que é a máis visitada de todas as que dinamizamos ao longo do curso; a quen non lle gusta ter nas súas mans novos libros e novas historias, aventuras, informacións en formatos e soportes diversos.
O vindeiro curso... máis lecturas para tod@s!
O vindeiro luns 19 de maio, no noso Mes das Letras, recibiremos a visita da libraría Aenea de Santiago.
No presente curso invitamos a todas as familias, a partir das 12:00 h., a que se unan a nosa xornada de libros e máis materiais educativos, que Lola nos irá presentando.
Premendo na seguinte imaxe poderedes acceder á galería de fotos da visita da libraría Aenea de Santiago de Compostela. Un éxito de visita, coma todos os anos!
.jpg)
Un mes de letras e... libros!
Conmemoramos o Día da Familia 2025 coas saídas, en familia, do alumnado e familias de educación infantil, 1º, 2ºA, 2ºB-3º de primaria. Imaxes que forman parte do mural de centro, pechando o PDI que nos ocupou estes dous últimos cursos.
As imaxes falan por si soas, felices compartindo momentos en familia e se son na natureza... moito mellor!
Grazas familias, por compartir os vosos momentos con tod@s nós, e feliz día a todas!
